జైలు కథలు..వంటే నేరమైన చోట -బి.అనూరాధ


జైలు కథలు..వంటే నేరమైన చోట -బి.అనూరాధ

జైలు


జైలు ఆవరణంతా శుభ్రంగా ఊడ్చి వుంది. ఎక్కడా ఒక్క ఎండిన ఆకు సైతం లేదు. ఇదెలా సంభవమబ్బా అనుకున్నా! నాలుగురైదుగురు వుండే ఇళ్ళే శుభ్రంగా పెట్టుకోవడం కష్టమే? ఇంక వంద మంది పెద్దలు పాతిక మంది పిల్లలు వుండే జైలు ఆవరణ ఇలా ఎలా ఉండగలిగింది అని ఆశ్చర్యపోయాను.
ʹదీదీ! నాస్తా గంట కొట్టారు. నువ్విక్కడే కూర్చో నేను తెస్తాను.ʹ అంటూ దులా ఒక స్టీలు గిన్నె తీసుకొని గబగబా వెళ్ళింది. నాకు నేనే స్వయంగా వెళ్ళి తీసుకోవాలనిపించింది. అలా లైనులో నిలబడి తీసుకొనే అనుభవం సరదాగా వుండేది కదా అని. కానీ మొదటి రోజు కదా వద్దంటే వినేలా లేదు చూద్దాం అనుకున్నా. నాస్తా చూడగానే దిగులేసింది. అంతకుముందే ఛాయ్ అనుభవం ఒకటయిపోయింది. ఇంతకాలం అత్యంత చెత్త చాయ్ అవార్డ్ కి కేవలం రైల్వే వాళ్ళకే అర్హత వుందనుకొనే దాన్ని. ఆ అభిప్రాయం వెంటనే మార్చేసుకొని జైలువాళ్ళకా అవార్డ్ ఇచ్చేశా. అమ్మో వాళ్ళని ఎవరూ బీట్ చేయలేరు.
రచయిత త్రిపుర, ʹభగవంతం కోసంʹ కథలో అనుకుంటా ʹ కాఫీ! అదొక వేడి గోధుమరంగు ఊహ.ʹ అనీ అది వుత్త గోధుమరంగు ఊహ అని, చివరకు అది ఒక వేడి ఊహ అని రకరకలుగా వర్ణిస్తాడు. ఇలాంటి కేటగిరీల్లోకి వేటికీ చెందని ఒక వింత ద్రవ పథార్థం ఇది. చివరికి మంచి చాయ్ అనేది విడుదల్లయ్యే వరకూ ఒక వేడి గోధుమరంగు ఊహ గానే మిగిలిపోయింది.
ఇప్పుడిక నాస్తా అంటే నాన పెట్టిన శనగలు. నాకు శనగలు ఏరూపం లోనూ పడవు. దిగులుగా చూస్తుంటే ʹదీదీ నా దగ్గర పల్లీలున్నాయి తింటావాʹ అంటూ వేయించిన పల్లీలు బయటకు తీసింది లలిత. వాటిని వలుచుకొంటూ కబుర్లలో పడ్డాం. నేను తొక్కలు అన్ని జాగ్రత్తగా తీసుకొని బయట పడేద్దాం అని లేవబోతుంటే ʹఇలా ఇవ్వుʹ అంది.
ఫరవాలేదు అని లేచేసరికి ఏదో ఘోరం జరిగిపోయినట్టు కెవ్వున అరిచి ʹఅమ్మో అవి చాలా ప్రియమైనవి (ఖరీదైనవి). ఇలాంటివేమీ పడెయ్యకూడదు.ʹ అంది.
బిత్తరపోయాను నేను. ఆమెకి నా మొహం చూస్తుంటే ఏదో సస్పెన్సు త్రిల్లర్ చూపిస్తున్న ఫీలింగ్ కలిగిందేమో అనిపించింది.
తరవాత మెల్లగా మూడు చిన్న చిన్న డబ్బాలు తీసింది. వాటిని త్రిభుజాకారంగా పేర్చింది. దాని మీద ఒక చిన్న స్టీలు గిన్నె పెట్టింది. దాని కింద ఒక ప్రమిద పెట్టింది. ఆవనూనె కొంచెం తీసి పోసింది. ఒక చిన్న గుడ్డపీలిక వత్తిలా చేసి దానిలో వేసి ʹలాల్ చాయ్ʹ (డికాక్షన్ ను ఝార్ఖండ్ లో లాల్ చాయ్ అంటారు.) చెయ్యడం మొదలుపెట్టింది.
ʹఅరె ఈ ప్రమిద ఎక్కడిది?
ʹదీపావళికి ఇక్కడ అందరికీ ఒక్కో ప్రమిద చొప్పున ఇస్తారు. ఎక్కడో అక్కడ వెలగడమే కదా కావాల్సింది, మనకి చాయ్ గిన్నె కింద వెలుగుతుంది అంతే. చాయ్ వరకూ ఈ నూనె సరిపోతుంది కానీ ఇంకొంచెం ఎక్కువేమయినా చెయ్యాలంటే పల్లీతొక్కలు, అరటిపండుతొక్కలు, పాతచెప్పులు, పాతగుడ్డలు, ప్లాస్టిక్ సంచులు, వేపపుల్లలు, ఎండుటాకులూ .......ʹతన లిస్టు ఇంకా కొనసాగుతుండగానే.... నా మెదడులో మెరుపు మెరిసినట్టు అర్థం అయ్యింది. అదే, ఆవరణ అంత శుభ్రంగా ఎందుకున్నదో ఇప్పుడు తెలిసింది. ఎండుటాకులకోసం ఎన్ని యుద్ధాలు జరగగలవో తరవాత కాలంలో నేను ప్రత్యక్షంగా చూశాను. ఒక్క గదితో వున్న ఆసుపత్రిలో అప్పుడప్పుడు దొరికే సెలైన్ బాటిల్స్ కోసం అయితే ప్రపంచ యుద్ధాలు జరుగుతాయి. ఇవి బాగానూ ఎక్కువ సేపూ మండుతాయి. కాబట్టీ చాలా డిమాండు.
జైల్లో మంట, వంట నిషేధం. అయినా ఏదో స్థాయిలో వంట నడుస్తది. మంట లేకుండా వంట కుదరదు కనక కాదేదీ మంట పెట్టడానికి అనర్హం అని అన్నీ చివరికి చేరేది పొయ్యిలోకే. అయితే అందరూ చేసుకొంటారని కాదు. కొంత మందికి మగవాళ్ళ వార్డుల నుండి కూరలు వస్తూ వుంటాయి. వాళ్ళు కొంత మంది కలిసి సామూహికంగా రేషన్ తీసుకొని కూరలు వండు కొంటారు. అవి మహిళా వార్డులో వుండే తమ కుటుంబ సభ్యులైన ఆడవాళ్ళకి పంపుతూ వుంటారు. వారానికి ఒకసారి 15మీ.లీ ఆవనూనె ఇస్తారు. అది కూడపెట్టి వంటలకి వాడుతుంటారు. ఝార్ఖండ్ లో నాకొచ్చిన మరొక కష్టం ఆవ నూనె వంటలు తినడం. కానీ అదే వాడతారు. అది అక్కడ ముఖ్యమైన పంట. అంతే కాకుండా వంటికి ఆవనూనె పూసుకోవడం చాలా అలవాటు ఇక్కడి వాళ్ళకి. కాబట్టి జైలులో దానికోసమే నూనె ఇస్తారు. తలకి రాసుకోడానికి వేరుగా కొబ్బరినూనే ఒక పేకెట్ ఇస్తారు. అది 15రోజులకి ఒకసారి.
*** *** ***
జైలులో యేడాది మొత్తం మీద నాలుగు నెలలపాటు వారానికోసారి మాంసం ఇవ్వాలనే నియమం వుంది. అలాగే పండగల సందర్భంగా విశేష భోజనం కావాలంటే ఆ పండగ కి రెండు వారాలు ముందు వేరే ఏదైనా కట్ చేసి మిగలబెట్టిన డబ్బుతో ఆ పండగ ఏర్పాట్లు చేయవచ్చు అనే నియమం కూడా వుంది. దీనిని ఉపయోగించుకొని ఖైదీల తిండిలో కోతలు మొదలవుతాయి. మాంసం ఇవ్వడం రెండు దఫాలుగా వుంటుంది. అందులో రెండు నెలల మాంసం హోలీ పండగ జరపడానికి, మరొక రెండు నెలల మాంసం దసరా పండగ జరపడానికి అనే పేరుతో కోత పెడతారు. వెరసి ఖైదీలకి పేరుకి ఒక దఫాలో ఒక సారి, రెండో దఫాలో ఒకసారి ఇస్తారు. దానితో నామ మాత్రంగా అయిపోయింది. ఇక ఖైదీలు పావురాల వెంట పడుతుంటారు.
రింకూ పావురాలు పట్టడం లో మహా దిట్ట. జైలు బిల్డింగ్ పాత కాలం నాటి బ్రిటిష్ కట్టడం. దానికి ఎత్తైన గోడలతో పాటు పైన కప్పుకి కొంచెం కింద పిజెన్ హోల్స్ వుంటాయి. వాటిల్లోనుండి పావురాలు బయటకూ లోపలికీ తిరుగుతుంటాయి. కొన్నిటిలో గూళ్ళు కట్టుకొని పిల్లలను పెడుతుంటాయి. ఉదయం పూట ఖైదీలు ఎండపెట్టే శనగల కోసం ఒకటే వచ్చి వాలుతుంటాయి. నా స్నేహితుడొకరు ʹగే నెక్ʹ అని ఒక పుస్తకం పంపాడు. అది చదివాక నాకు పావురాల మీద ఒక ప్రత్యేకమైన అభిమానం కలిగింది. అసలు జైలుకి పావురాలకి ఒక అవినాభావ సంబంధం ఏదో వుందనిపిస్తుంటుంది. గుంపులుగా పావురాలు అలా వచ్చి వాలుతూ వుంటాయి. బయట వున్నప్పుడు అవి స్వేచ్చ కి ప్రతీకలుగా అనిపిస్తే జైల్లో మాత్రం స్వేచ్చ కోల్పోవడానికి ప్రతీకలుగా అనిపిస్తాయి. వాటిని గమనించడం అలవాటుగా మొదలయ్యాక వాటిలో ఎన్ని రంగులుంటాయో వాటి మెడ నిజంగానే ఎంత అందంగా వుందో జీవితంలో మొదటిసారిగా గుర్తించాను నేను. అంతకు ముందు కాకులన్నీ ఒకటే లాగా వున్నట్టు పావురాలు కూడా ఒక్కలాగే అనిపించేవి. మహా అయితే తెల్ల పావురాలు, బూడిదరంగు పావురాలు అంతే. ఆ కాలంలో చలం రాసిన బుజ్జిగాడు తెగ గుర్తుకొచ్చేది. (అది గోరింకల గురించి అయినప్పటికి) అప్పట్లో గోపాలకృష్ణగాంధీ గవర్నర్ పదవినుండి రిటైర్ అయ్యి, బహుశా హిందూస్థాన్ టైమ్స్ లో అనుకొంట కాలమ్ రాస్తున్నారు. ఒకసారి ఆయన తన బాల్కనీకి రెగ్యులర్ గా వచ్చే గోరింకల గురించి రాశారు. అందులో ఒక ఆడ గోరింక కుటుంబ హింసకి గురయ్యినట్టు అనుమానించారు కూడా. ఇలా పక్షుల గురించి ఎవరేం రాసినా తెగ చదివేయడం వాటిని జీవితంలో భాగం చేసేసుకోవడం అలవాటయ్యింది. జైలు నాకు పక్షులని, పువ్వులని దగ్గర చేసింది. జైలులో నా జీవితానికి అందాన్ని, ఆనందాన్ని తెచ్చిపెట్టాయివి. అలాంటి టైంలో నాకొక క్లిష్టపరిస్థితి ఎదురయ్యింది. నేను ఒక పావురం తగువు తీర్చాల్సి వచ్చింది. ఆహారపు అలవాట్ల రీత్యా నేను మాంసాహారినే. అనేక రకాల మాంసాలు తిన్న దానినే. అయితే కొత్తగా పావురాల పట్ల పెరిగిన ఈ ప్రేమ నన్ను సంకటంలో పడేసింది. పావురాలు గుంపుగా వాలినప్పుడు హటాత్తుగా వాటి మీద టవల్ విసిరి వాటిని వొడుపుగా పట్టుకొనేది రింకూ.
అయితే ఇప్పుడు తగవు ఎక్కడొచ్చిందంటే, రింకూ కూర వండుతున్నప్పుడు, రుదన్ గాడు ఆమె వెనకాలే తిరుగుతున్నాడు. ఆమె తనకి వాటా ఇవ్వబోవడంలేదని అర్థం అయ్యాక తన ఇద్దరన్నదమ్ములైన బుధన్, సుదన్ లని కూడా తీసుకొచ్చాడు. దాంతో కూడా పని అయ్యేటట్టు లేదని వాళ్ళమ్మ పారోదేవిని కూడా లాక్కొచ్చారు. అసలు పావురాన్ని పట్టుకొని మెడకొరికి చంపింది రుదన్ గాడేనని పిల్లలంతా పారోకి సాక్ష్యం చెప్పారు. నోరులేని మూగజీవాలని అన్యాయం చేస్తే పుట్టగతులుండవని, ʹబీస్ సాల్ సజాʹ (ఇరవై యేళ్ళ శిక్ష) పడుతుందని పారో నోరుచేసుకోంది. పావురాన్ని శుభ్రం చేసి మాషాలాలు దట్టించి వండింది ఆఫ్టరాల్ ఒక పిల్లి వెధవకి ఇవ్వడానికి కాదని రింకూ వాదన. కానీ పారోదేవికి అవి ఆఫ్టరాల్ వెధవ పిల్లులు కానే కాదు. తన బిడ్డల్లాగా చూసుకొంటుంది. కాబట్టి, వాటికి అన్యాయం జరగనిచ్చే ప్రశ్నేలేదు. ఇక ఇద్దరూ ఒకరినొకరు ఆపకుండా తిట్టుకొంటున్నారు. జైల్లో ఎవరైనా ఇద్దరు ఖైదీలు తిట్టుకొంటున్నప్పుడు తీర్పు చెప్పడానికి పోవడంకన్నా బుద్ధి తక్కువ పని ఇంకొకటి లేదు. కానీ ఒక పక్షం పిల్లులు కావడం వాటికి పిల్లల మద్ధతు పూర్తిగా వుండడం, పైగా ఆ పిల్లులు కూడా రింకూ మీదకు గాండ్రు మని దూకడానికి సిద్ధంగా వున్న పులుల్లా కొట్లాడుతుంటే అందరం వార్డుల్లోనుండి బయటకు వచ్చి వినోదం చూసే మూడ్ లోకి వచ్చేశాము. లేకపోతే అది పెద్ద గొడవగానే పరిణమించేది. చివరికి నన్ను కూడా అందులోకి లాగాక, రెండొంతులు రింకూ తీసుకొని ఒక వంతుని పి‌ల్లులకి ఇవ్వాలని, దానిని వాళ్ళమ్మ మూడు భాగాలు చేసి మూడు పిల్లులకీ ఇవ్వాలని ఫైసలా చేశాను. నిజానికి ఇది కొంచెం సరదా వ్యవహారంగా పరిణమించినందువల్ల కానీ లేకపోతే నేనసలు ఎంత మంది వచ్చి అడిగినా తగాదాలు తీర్చే పనికి అస్సలు పోను. ఎందుకంటే దానివల్ల ఏదో ఒక పక్షానికి శత్రువులుగా మిగలడం తప్ప మనం సాధించేది ఏమీ వుండదు.
రింకూ రుదన్ గాడికేసి చూసి, ʹ అరె రుదనవా, సాలా నిన్ను కూడా వండుకొని తింటానొక రోజు చూస్తావుండుʹ అని బెదిరించింది.
ʹమ్యావ్!ʹ అన్నాడు రుదన్. అంటే ʹఏడిసావులేʹ అని అర్థం. పారో చెప్పింది. ***

Keywords : jharkhand, jail, maoist
(2019-01-21 06:04:33)



No. of visitors : 405

Suggested Posts


మిలియన్ మార్చ్ స్పెషల్ -బమ్మిడి జగదీశ్వరరావు

ʹమిలియన్ మార్చ్..ʹ ʹఅది ముగిసిన ముచ్చట..ʹ ʹమరేం ముచ్చట మాట్లడల్నే?ʹ ʹథర్డ్ ఫ్రంట్ గురించి మాట్లాడు.. కేసీఆరు దేశానికి దారి చూపిస్తుండు!ʹ ʹముందుగాల తెలంగాణ ప్రజలకి దారి సూపించమను,

జైలు కథలు..మనిషీ వర్సెస్ జంతువు -బి.అనూరాధ

జైలుకి వచ్చిన మొదటి రోజున సాధారణంగా ఎవరైనా ఏడుస్తుంటారు. కానీ ఆమె ఏడుపు చాలా దైన్యంగా వుంది. ఎంత మంది పలకరించినా పలకలేదు. కొంతమంది భాషా సమస్య అనుకోని వేరు వేరు భాషల్లో కూడా ప్రయత్నించారు.

జైలు కథలు... సత్రా. సి. ఎల్ - బీ.అనురాధ‌

జైల్లో పేరు కన్నా ముందు అడిగేది ఏం కేసు అని? నా విషయంలో నేను తేలికగా అర్థమయ్యేది అదే కాబట్టి మావోవాది అని చెప్పేదాన్ని. ʹరాజనైతిక్ బందీʹ అంటే ఎవ్వరికీ అర్థం కాదు. అయితే తరవాత నన్ను ఎవరికన్నా పరిచయం చెయ్యాలంటే వాళ్ళు నన్ను సత్రా సి.ఎల్ అనడం గమనించాను. అదే విషయం ఒకామెని అడిగాను.ఆమె నా అజ్ఞానానికి నవ్వి ʹఅంత చదువుకొన్నావు నీకు తెలవదా భలే మజాక్....

జైలు కథలు...బలి -బి.అనూరాధ

పల్సగూడా నియోజకవర్గం మొత్తం పోస్టర్లు పడ్డాయి. ʹఈసారి కాషాయజెండా ఎగరడానికి ఈ చిన్న ఆటంకాన్ని తొలగిస్తే అంతా సజావుగా సాగిపోతుందనుకొన్నాను. ఇప్పుడదే మన మెడకు చుట్టుకునేటట్టుందే!ʹ అతను సాలోచనగా దూరంగా చూస్తూ అన్నాడు....

జైలు కథలు... నేరమూ – శిక్ష -బి.అనూరాధ

చిన్న పిల్లల్లో వుండే ఉత్సాహంకాని, కళ్ళల్లో వెలుగు కానీ ఆమెలో ఎక్కడా కనపడలేదు. ఇంత చిన్నపిల్లని మహిళావార్డుకి ఎందుకు పంపారో? జువనైల్ వార్డుకి పంపక అనికూడా అనిపించింది.

జైలు కథలు...బేబీస్ డే అవుట్ - బి. అనూరాధ

చాచా నెహ్రూ అంటే ఎవరు?ʹ ʹసోనియా గాంధీ కా బాప్ʹ (సోనియా గాంధీ వాళ్ళ అయ్య) అంది జూలీ! మొట్టికాయ వేసింది నిర్మల. పిల్లలందరూ నవ్వారు.

జైలు కథలు...మున్నీ బద్ నామ్ హుయీ - బి. అనూరాధ

ఆమె పేరు మున్నీ కాదు. కానీ అందరూ ఆమెని మున్నీ అనే అంటారు. మహిళావార్డులో గానీ పురుషుల వార్డులో గానీ ఆమెని తెలియనివారు లేరు. తెలియడం అంటే ఆమె అందరికీ పరిచయస్తురాలని కాదు. ఆమెని గమనించనివాళ్ళు లేరు అని.

జైలు కథలు...ఏక్ చాదర్ మైలీసీ -బి. అనూరాధ

సాయంత్రం పూట సాధారణంగా ఎవ్వరూ వార్డుల్లో వుండరు. ఖాళీగా వుంటాయవి. నేను వాకింగ్ చేస్తుండగా ఎవరో చాలా కడుపునొప్పిగా ఉందని, ఒక టేబ్లెట్ కావాలని అంటే మందుల డబ్బా కోసం వార్డులోకి వచ్చాను.

జైలు కథలు...ఏది జైలు? -బి. అనూరాధ

సునిత బీహార్ కి చెందిన సంపన్న రాజపుత్రుల ఉమ్మడి కుటుంబంలో పెద్ద కోడలు. అత్తగారు లేదు. ఆమె ʹదేవరానిʹ (తోటికోడలు) ఉరేసుకొని చనిపోయింది. చనిపోయినామె పుట్టింటివాళ్ళు సునీతమీదా, ఆమె భర్త మీద, మామగారిమీద, కొడుకుమీద కేసుపెట్టారు.

చందమామని చూడని వెన్నెల -బి.అనూరాధ

ʹనా పుట్టిన రోజు గురించి నాకో కొత్త విషయం తెలిసింది. తిథిల ప్రకారం అయితే నేను బుద్ధ పూర్ణిమ రోజు పుట్టానట. తెలుసుగా అది చలం పుట్టిన రోజు కూడా. నువ్వు ఇన్నేళ్ళ తరవాత వచ్చావు కనక ఆరోజు ఒక చిన్న గెట్ టు గెదర్ ఏర్పాటు చేస్తున్నా.

Search Engine

నల్గొండ‌లో... ఫిబ్రవరి 9,10 తేదీల్లో విరసం సాహిత్య పాఠశాల
COSTISA demands quashing of fabricated FIR against Prof. Anand Teltumbde!
దేశద్రోహం కేసు : JNU విద్యార్థి నేతలపై చార్జ్ షీట్ తిరస్కరించిన కోర్టు
Dragging Anand Teltumbde into ʹterroristʹ allegations and raiding his house is an attack on freedom of expression : Swami Agnivesh
మీ మద్దతు నాకిప్పుడు కావాలి - ఆనంద్‌ తెల్తుంబ్డే
Immediate and Complete Withdrawal of all Charges against Dr. Anand Teltumbde
ʹపాకిస్తాన్ జిందాబాద్ʹ అని అరిచింది ఏబీవీపీ విద్యార్థులే.. సంచలన వాస్తవాలు బయటపెట్టిన మాజీ నాయకులు
మనను ఆక్రమిస్తున్న ఈ వ్యాధిని ప్రతిఘటిద్దాం- అరుంధతీ రాయ్
A Statement by Umar Khalid and Anirban Bhattacharya in the context of the Chargesheet
ఎస్సీ, ఎస్టీల రిజర్వేషన్ ను తొలిగించడమే ఆరెస్సెస్‌-బీజేపీ అసలు లక్ష్యం...జిగ్నేష్ మెవాని
కన్నయ్య, ఉమర్‌, అనీర్బన్‌ లపై మూడేళ్ళ తర్వాత ఛార్జ్ షీట్ దాఖలు చేసిన పోలీసులు
కాగితం మీద అక్షరానికి కట్టుబడ్డ కవి
అగ్రవర్ణ పేదలకు రిజర్వేషన్లు ఇవ్వడం రాజ్యాంగ స్పూర్తికి వ్యతిరేకం
మానవత్వం మరచి ఆంబులెన్సును అడ్డుకున్న పోలీసులు.. క్షతగాత్రులపై దాడి
కలాల్లో ఇంకిపోని సిరా, టకటకలు మానని కీబోర్డులు...
కలాల్లో ఇంకిపోని సిరా.. అరుంధతీ రాయ్‌కి జైలు జీవితం అనుభవించిన సామాజిక కార్యకర్త రాసిన ఉత్తరం
A ten year Sahas from US written a reply to Professor Saibabaʹs letter.
Varavara Rao written a letter about Nomula Satyanarayana from Pune jail
అగ్రకులాలకు రిజర్వేషన్లు సామాజిక న్యాయభావనకు వ్యతిరేకం, రాజ్యంగ విరుద్ధం
దళిత నటి విషాద గాథ‌ !
కశ్మీర్‌లో కేంద్ర ప్రభుత్వం చేస్తున్న మారణహోమాన్ని చూడలేక రాజీనామా చేసిన ఐఏఎస్
ప్ర‌మాదంలో ప్రైవ‌సీ
తొలగించబడిన చట్టం కింద‌ 22 మంది అరెస్టు...సుప్రీం సీరియస్
నాలుగున్నర దశాబ్దాల నిత్య నిర్బధం - ఎన్.వేణుగోపాల్
శ్రీకాకుళం జిల్లా జైలు - వెట్టిచాకిరీకి నిలయం
more..


జైలు