దేశమంతటా ʹషాహీన్ బాగ్ʹ లు పుట్టుకురావాలి..!!
సీఏఏ, ఎన్నార్సీలకు వ్యతిరేకంగా ఢిల్లీలోని షహీన్ బాగ్ లో 50 రోజులుగా సాగుతున్న నిరసన ప్రదర్శనలపై ఎస్ ఏ డేవిడ్ అనే రచయిత తన ఫేస్ బుక్ వాల్ పై పెట్టిన పోస్ట్ యదాతథంగా....
ʹడేగʹ చూపులో ఓ ప్రత్యేకత ఉంటుంది. మనుషులు సెకనుకు 50-60 ఫ్రేములు మాత్రమే చూడగలిగితే డేగ మాత్రం సెకనుకు 100 కు పైగా ఫ్రేములను కచ్చితంగా గుర్తించగలదని పక్షి శాస్త్ర వేత్తలు చెబుతున్నారు. దాన్ని తీక్షనైనా చూపులే పరిసరాలను వేగంగా నిశితంగా పరిశీలించేలా చూస్తాయి.
ʹషాహీన్ʹ (Shaheen) అని మీరు గూగుల్ లో టైపు చేసి చూడండి. ʹషాహీన్ ఫాల్కన్ʹ (Shaheen Falcon)అనే డేగ ప్రత్యక్ష మవుతుంది. షాహీన్ అంటే ʹడేగʹ అనే అర్థం. దక్షణ ఆసియాలోనే కనిపించే అరుదైన డేగ ఇది.
ఇక ʹబాగ్ʹ అంటే తోట, ఉద్యానవనం అని ప్రత్యేకంగా చెప్పాల్సిన పనిలేదనుకుంటా.☺
బహుశా ఆ పేరు లో ఉన్న ప్రత్యేకత వలనో ఏమో ʹషాహీన్ బాగ్ʹలోని ప్రజలు CAA, NRC లను అమలుచేస్తే వచ్చే ప్రమాదాలను అందరికంటే ముందుగానే పసిగట్టి ఆందోళన బాట పట్టారు..!
డిసెంబరులో జామియా మిల్లియా ఇస్లామియా విద్యార్థులపై పోలీసులు దాడులు చేసిన ఘటనను ప్రపంచమంతా వీస్తుపోయేలా చూసింది. పోలీసుల అమానుష దాడి నుంచి తోటి విద్యార్థిని కాపాడ్డానికి ఇద్దరు జామియా యూనివర్శిటీ ముస్లిం అమ్మాయిలు (Ayesha Renna & Ladeeda Farzana )చూపించిన ధైర్యసాహసాలు చాలామందికి స్ఫూర్తినిచ్చాయి.
ఆ స్ఫూర్తిని అందిపుచ్చుకున్న వాళ్లలో ʹషాహీన్ బాగ్ʹ ప్రజలు ముఖ్యులు. తమ పక్కనే ఉన్న యూనివర్సిటీ విద్యార్థులపై పోలీసులు విరుచుకు పడుతుంటే చూస్తూ ఉండలేకపోయారు. ఏదో ఒకటి చేయాలని ఆలోచించారు. తమ ప్రాంతంలోనే ఒక గ్రౌండులో నిరసనదీక్షకు కూర్చున్నారు. కేవలం గుప్పెడు మంది నిరసనకు కూర్చుంటే పట్టించుకునేది ఎవరు? పోలీసులు కూడా అదే అనుకున్నారు. కొద్దిసేపు అరచి వెళ్లిపోతారులే అని భావించారు. కానీ అలా జరగలేదు. ఆ కొద్దిమందికి తోడుగా ఇంకొంతమంది వచ్చి కూర్చున్నారు. ఇంట్లో కూర్చుని చేసేది ఏముంది అనుకున్నారో ఏమో క్రమక్రమంగా సాయంత్రం అయితే చాలు పిల్లా, పెద్దలు, పండు ముసలి వరకూ అందరూ వచ్చి కుర్చోవడం ఓ రోజు వారి వ్యవహారంగా మారిపోయింది.
ఇప్పుడీ ʹషాహీన్ బాగ్ʹ జాతీయస్థాయి ప్రతిఘటనకు మారుపేరుగా మారింది. మోడీ ప్రభుత్వం ప్రవేశపెట్టిన పౌరసత్వ సవరణ చట్టాన్ని సవాలు చేసే నిరసనగా మారింది. దేశంలోని అన్ని ప్రాంతాలకు ప్రేరణగా మారిపోయింది. అందుకే దేశం నలుమూలల నుండి మేధావులు, ఉద్యమకారులు, హక్కుల కార్యకర్తలు, జర్నలిస్టులు, విద్యార్థులు, రైతులు తమ సంఘీభావం ప్రకటించడానికి వెళ్లివస్తున్నారు. చుట్టుపక్కల వ్యాపారస్తులు స్వచ్ఛందంగా ఆహారాన్ని, మంచినీళ్ళని, బ్లాంకెట్లని అందిస్తున్నారు.
షాహీన్ బాగ్ మహిళలు మొదలెట్టిన ఈ శాంతియుత నిరసన ఇతర ప్రాంతాలకు విస్తరించకూడదని, దాన్ని విచ్చిన్నం చేయడానికి బీజేపీ నేతలు, మంత్రులు రెచ్చగొట్టే ప్రసంగాలు చేస్తూ ఉన్మాద మూకలను నిరసన కారులపైకి ఉసిగొల్పుతున్నారు. యాక్టివ్ గా ఉన్న విద్యార్థులపై దేశద్రోహ కేసులు నమోదు చేస్తున్నారు. కానీ ఎన్ని ఆటంకాలు కల్పించిన తన శాంతియుత నిరసన కొనసాగుతూనే వుంటుంది అక్కడివాళ్ళు నిరూపించి చూపుతున్నారు.
జామియా మిల్లియా యూనివర్సిటీ లోని ఇద్దరు ముస్లిం అమ్మాయిలు చూపిన ధైర్యసాహసాలు ఒక నిప్పును రాజేశాయి. నెమ్మదిగా ఈ ఉద్యమం దేశవ్యాప్తంగా అలుముకుంటోంది..ఇప్పుడు కావాల్సింది కూడా అదే. దేశమంతటా షాహీన్ బాగ్ లు పుట్టుకురావాలి.
హ్యాట్సాప్ జామియా..✊
హ్యాట్సాప్ షాహీన్ బాగ్..✊
- SA David
(https://www.facebook.com/photo.php?fbid=628899291254829&set=a.140394543438642&type=3&theater)
Keywords : Shaheen Bagh, Delhi, Reject CAA, NRC, NPR, Protests
(2024-03-09 15:12:00)
No. of visitors : 456
Suggested Posts
0 results